Share:

दसैँ नेपालीहरूको एक महान तथा महत्त्वपूर्ण चाडपर्व हो । दसैँ आश्विन शुक्ल पक्ष प्रतिपदादेखि पूर्णिमासम्म १५ दिन विशेष रुपमा मनाइन्छ । दसैँमा परिवारका सबै सदस्यहरू एकै ठाउँमा जम्मा भई मिठा मिठा खाने कुरा बनाएर खाने प्रचलन छ । दसैँको बेला मानिसले आफ्नो क्षमता अनुसारको आफू र आफ्ना परिवारका सदस्यहरूलाई नयाँ नयाँ लत्ताकपडा समेत किन्ने तथा सदस्यहरू कुनै एक ठाउँमा भेला भएर चङ्गा उडाउने र पिङ खेल्ने समेत गरिन्छ। दसैँको समयमा आफ्ना विशेष कामले घरबाट टाढा रहेका मानिसहरू आफ्नो गाउँघर फर्किन्छन् । विशेष गरेर घटस्थापनाको दिन विधिपूर्वक जमरा राख्ने प्रचलन छ । उक्त दिन राखिएको जमरालाई नौ दिनसम्म विशेष पूजा गरिन्छ । दसैँको आठौँ, नबाैँ र दसाैँ दिनलाई विशेष दिनको रुपमा मानिन्छ। दसैँको सातौँ दिन फूलपाती हो । यो दिन घर घरमा भगवानको प्रसाद फूलपाती भित्र्याइन्छ। दसैँको आठौँ दिन अर्थात् अष्टमीमा दुर्गाको विशेष पूजा तथा कालरात्री पूजा गरिन्छ । दसैँको नबाैँ दिन अर्थात् महानवमीमा विभिन्न उपकरण, औजार, हातहतियार, सवारी साधनको विशेष पूजा गर्ने गरिन्छ । दसैँको दसाैँ दिन अर्थात् महादशमीमा माता दुर्गाको प्रसाद स्वरूप आफ्ना मान्यजनको हातबाट टीका तथा जमरा लगाइन्छ र आशीर्वाद लिइन्छ । ठाउँ अनुसार टीका तथा जमरा लगाई आशीर्वाद लिने र दिने काम कोजाग्रत पूर्णिमाको दिनसम्म गरिन्छ । त्यसैले दसैँ महान तथा विशेष चाड हो । दसैँ असत्यमाथि सत्यको विजय भएको उत्सवको रुपमा नौँ  दिन र रातसम्म माता दुर्गाको पूजा गरेर मनाउने चाड हो । त्यसैले मलाई दसैँ धेरै मन पर्छ ।