Share:

पदयात्रा

विद्यालयको भित्तेपात्राे अनुसार हामी कक्षा ३ का साथीहरू र गुरुआमासँगै काठमाडौँको तारेभिरसम्म पदयात्रामा गयौँ । सुरुमा हामीले विद्यालयमा खाना खायौँ र करिब १० बजे विद्यालयको बसबाट हामी जगडोल झन्डा पार्कसम्म गयौँ । करिब हामी आधा घण्टा झन्डा पार्कमा घुम्यौँ । त्यहाँ नेपालको ठुलो झन्डा फहराइरहेको थियो। त्यहाँ देखि हामी बसमा केही अगाडिसम्म गयौँ । त्यहाँ हाम्रो पदयात्रा सुरु भयो। हामीलाई सरिना गुरुआमाले बाटो देखाउँदै अगाडि हिँड्नुभयो र हामी गुरुआमालाई पछ्याउँदै पछिपछि हिँड्यौँ । हाम्रो सुरक्षाको लागि सबैभन्दा पछाडि सबिन सर हुनुहुन्थ्यो। हामी साथीहरू एकआपसमा भलाकुसारी गर्दै अगाडि बढिरह्यौँ । हामी हिँड्दै गर्दा केही कुकुरहरू हाम्रो साथी बनेर बाटो देखाउँदै हिँडिरहे । त्यो देखेर हामी रमायौँ । बाटोमा हामीले पदयात्रा गर्दा ठुला ठुला ढुङ्गा, रुखबिरुवा, पहाड र खोल्सा, सानो झरना, जनावर आदि विभिन्न चिजहरू देख्यौँ । पदयात्राको क्रममा हामी शिवपुरी राष्ट्रिय निकुञ्ज पुग्यौँ। त्यहाँ ठुलो जङ्गल थियो । राष्ट्रिय निकुञ्जको बाटो हुँदै तारेभिर डाँडा पुग्यौँ । त्यहाँ ठुलो जङ्गल थियो । डाँडामा हलिउडको जस्तै ठुलो अक्षरमा तारेभिर अङ्ग्रेजीमा लेखिएको थियो। त्यहाँबाट हामीले काठमाडौँ सहर हेर्‍याैँ । त्यहाँबाट काठमाडौँ हेर्दा धेरै घरहरू मात्रै थिए। हरियाली केही थोरै ठाउँमा मात्र देखियो। हामी लगभग तीन घण्टाको पदयात्रामा हिँड्यौँ । तारेभिरबाट फर्केर केही तल पुगेपछि आफूले बोकेका खाजा बाँडीचुँडी खायौँ । पदयात्रा गर्दा केही साथीहरू चिप्लेर लडे काेही साथीहरूे हिँड्न गाह्रो भयो भने । हामीले एकअर्का साथीहरूलाई सहयोग गर्दै पदयात्रा पूरा गर्‍याैँ । पदयात्रा पूरा गरेपछि बस चढेर पुन हामी विद्यालयतर्फ फर्कियौँ ।