Share:

श्रीश भण्डारीका कृतित्वमा प्रायः समाज, बालबालिका तथा युवाको जीवन सुधारका उपाय प्रस्तावित हुन्छन्; त्यही क्रममा प्रस्तुत भएको “अठोट: उज्ज्वल भविष्यको” एक आत्मविकासात्मक गाइड हो जुन विशेष गरी किशोर, किशोरी र युवावर्गका लागि लक्षित गरिएको छ । पत्रकारितामा सक्रिय भण्डारीले नेपाली शिक्षण माध्यमलाई सरल र प्रभावकारी भाषामा प्रस्तुत गर्दै स्वास्थ्य, शिक्षा, समय व्यवस्थापन, आदत संलग्नता, मानसिक शक्ति र सकारात्मक सोचजस्ता बिषयमा गहिरो अन्तर्दृष्टि दिएका छन् । पुस्तकको मूल उद्देश्य भनेको “अठोट” अर्थात् दृढ सङ्कल्पको महत्त्व बुझ्न र व्यक्तिमा अनुशासन, जिम्मेवारी भाव तथा आत्मविश्वास जगाउन हो । यस्तो सङ्कल्पले मात्र वास्तविक जीवनमा लक्ष्य प्राप्ति सम्भव भई व्यक्तिले उज्ज्वल भविष्य स्थापित गर्न सक्दछ भन्ने बलियो सन्देश लेखकले दिन खोज्नु भएको छ । यो पुस्तक केवल पाठ्यसङ्ग्रह होइन तर दैनिक जीवनमा प्रयोग गर्न मिल्ने व्यावहारिक अभ्यासको कोश हो, जहाँ छोटाछोटा कदम, सही सोच र निरन्तर मूल्याङ्कनका माध्यमबाट जीवनलाई सुधार्न मार्ग निर्देशित गरिएको छ।

पुस्तकलाई कुल २० ससाना तर लक्ष्यपरक अध्यायमा विभाजन गरिएको छ, जसले विभिन्न जीवनशैली बिषयवस्तुहरूलाई संयुक्त रूपमा सम्बोधन गर्छ । शुरुवाती अध्यायहरूमा “समयको महत्त्व” र “लक्ष्य निर्धारण”बारे आधारित अभ्यासहरू छन्, जसले पाठकलाई योजना बनाउन र त्यसलाई अनुसरण गर्न सिकाउँछन् । त्यसपछि “स्मरणशक्ति सुधार” “पढाइमा ध्यान केन्द्रित रहने उपाय”, “स्वस्थ खाना र व्यायाम”, “डिजिटल सीमितता”, अनि “आत्म-विश्वास र आत्म-निर्भरता विकास” सम्बन्धी वैज्ञानिक सुझावहरू प्रस्तुत गरिएको छ । खासगरी पुस्तकमा उल्लिखित २८ महान् व्यक्तित्वहरू गौतम बुद्ध, अब्राहम लिङ्कन, आइन्स्टाइन, स्टिभ जोब्स, जे.के. रोलिङ आदिको जीवन व्यवहारका सन्दर्भहरूले प्रेरणा मिल्ने खालका छन् । यी जीवनीहरूले मात्र होइन, ती व्यक्तिले कसरी परिस्थितिमाथि विजय प्राप्त गरे र आफ्नो मार्ग बनाए ? ती अनुभवहरूद्वारा पाठकले आफ्नो जीवनमा पनि चुनौती सामना गर्न सक्ने भावना उत्पन्न हुन्छ । यसरी पुस्तकले जीवनका व्यावहारिक अभ्यासका माध्यमबाट व्यक्तिको आन्तरिक परिवर्तन ल्याउने उद्देश्य स्पष्ट रूपमा प्रस्तुत गर्दछ ।

“अठोट” पुस्तकको विशेषता यसको सरल भाषा, व्यवहारिक उदाहरण र मनोविज्ञान सम्बन्धी उपादेय सुझावहरू हुन् । आजको डिजिटल युगमा विद्यार्थीहरू मोबाइल र इन्टरनेटको जालोमा फसिरहेका वेला पुस्तकले ‘डिजिटल डिटोक्स’ र समय सीमितता जस्ता विषयहरू उठाएर सचेत गराउँछ । साथै, पुस्तकले मात्र सैद्धान्तिक ज्ञान होइन, समग्र व्यक्तित्व विकासमा केन्द्रित भएर स्वस्थ खाना, पर्याप्त निद्रा, व्यायाम, सकारात्मक साथी छनोट र रिस नियन्त्रणमा पनि उपायहरू दिएको छ । उदाहरण स्वरूप, “प्रति दिन कम्तिमा आठ घण्टा निद्रा”, “हरेक बिहान ध्यान/ध्यान योग”, “फलफूल र साग सब्जीमा आधारित भोजन” र “हावापानीमा समय बिताउने अभ्यास” जस्ता सुझावले व्यक्ति मात्र होइन समाजलाई पनि स्वस्थ र निर्माणात्मक बनाउन भूमिका खेल्छ । यसरी पुस्तकका सामग्रीले यथार्थ जीवनमा परिवर्तन ल्याउने क्षमता देखाउँछ । पुस्तकका सुझावहरू प्रयास आधारित भएकाले प्रारम्भिक रूपमा चुनौतीपूर्ण लाग्न सक्छ तर यदि नियमित अभ्यास गरियो भने व्यक्तिगत जीवनमा स्पष्ट परिवर्तन ल्याउन सकिन्छ ।

म आफैँ एक विद्यार्थीको रूपमा जब मैले “अठोट” पुस्तक पढेँ, मैले जीवनका धेरै क्षेत्रमा उजागर गर्न सक्ने अनुभव पाएँ । “आफ्नै जिम्मा लिनु” भन्ने विचारले मलाई मेरो पढाइ यात्रालाई पुनः स्मरण गराइदियाे । मैले समय तालिका बनाई त्यसलाई पालना गरी व्यवस्थित गर्नतर्फ डटेर लागेँ । “स्मरणशक्ति सुधार” सम्बन्धी प्राविधिक सुझावहरूले मेरो सम्झने क्षमता सुधारियो । “डिजिटल सीमितता” र “समय व्यवस्थापन” जस्ता अंशहरूले मलाई मोबाइलमा बित्ने समय घटाउन र पढ्न उत्प्रेरित गरे । स्वास्थ्य सम्बन्धी सुझाव दैनिक व्यायाम, पर्याप्त पानी पिउनु र सन्तुलित आहारले मेरो शरीर र मस्तिष्क दुबैलाई जागरुक बनाए । “सकारात्मक सोच” को सामग्रीले जीवनका भावनात्मक उतारचढावमा पनि स्थिरता ल्यायो । यस्ता अनुभवहरूले मलाई स्कुले जीवनमा नेतृत्व विकास, आत्मविश्वास जागरण र परिवार वा समूहमा सहयोगी भूमिका खेल्न प्रेरित गरे । वास्तवमा, लेखकका सुझावहरू केवल ज्ञान सुझाव मात्र नभई व्यक्तिगत आत्मपरिवर्तनको वास्तविक उपकरण हुन् ।

समग्रमा अठोटले नेपाली युवाहरू तथा किशोर किशोरीलाई जीवनका महत्त्वपूर्ण पक्षहरूमा सचेत, मजबुत र सकारात्मक बनाइदिन्छ । पुस्तकले जुनसुकै वर्गका पाठक चाहे विद्यार्थी होस् वा शिक्षक, अभिभावक वा युवा इच्छुक जो उत्कृष्ट जीवनशैली र मानसिक परिपक्वता चाहन्छ सबैका लागि उपयोगी सन्देश बोकेको छ । यद्यपि पुस्तकमा केही सुधार हुनसक्ने रहेको छ; उदाहरणका लागि, लेखकले आफ्नो व्यक्तिगत जीवनका चुनौतीहरू साझा गर्दा अझ प्रभावकारी हुन्थ्यो । साथै प्रत्येक अध्यायमा थोरै अनुसन्धानात्मक तथ्य वा उदाहरणहरू, जस्तै अध्ययन डाटाबेस, रेजा अध्ययन वा केस स्टडी समावेश गर्न सकिँदा पुस्तकको वैज्ञानिक आधार अझ मजबुत हुन्थ्यो । तथापि, यसको सरल, मनोवैज्ञानिक दृष्टिकोण र व्यावहारिक अभ्यासहरूको समावेश भनेको वास्तविक जीवनमा “परिवर्तन सक्षम गर्न सकिने ज्ञान” दिनमा सक्षम छ।

अतः यदि तपाईं आफ्नो दैनिक जीवन सुधार्न, अनुशासन विकास गर्न, आत्मविश्वास निर्माण गर्न र सकारात्मक आदत बनाइ सामाजिक, शैक्षिक जीवन सुधार्न चाहनुहुन्छ भने, “अठोट उज्ज्वल भविष्यकाे” तपाईंको लागि अत्यन्त उपयुक्त साथी सावित हुन सक्छ । यस पुस्तकको अध्ययनले जीवन मात्र होइन, सोचाइ, दृष्टिकोण र परिणाममा पनि दीर्घकालीन सकारात्मक प्रभाव पार्ने सम्भावना छ।