Share:

परिवार हाम्रो जीवनको पहिलो विद्यालय हो जसले हामीलाई माया, सम्मान, सहयोग र संस्कार दिएर असल व्यक्ति बन्न सिकाउँछ । परिवारले हामीलाई सुरक्षा दिनुका साथै सुखदुःखमा साथ दिन्छ । परिवार हाम्रो जीवनको आधार हो । मलाई मेरो परिवार सबैभन्दा प्यारो लाग्छ । मेरो परिवारमा हजुरबुबा, हजुरआमा लगायत ६ जना सदस्यहरू हुनुहुन्छ । हामी सबै मिलीजुली एकअर्कालाई सहयोग गर्छौं । म मेरो परिवारलाई ससाना काममा सहयोग गर्दै काम गर्न पनि सिक्छु । कहिलेकाहीँ गमलामा फूल रोप्न सघाउँछु । यसरी घरमा फूल लगाउँदा घर सुन्दर देखिन्छ र वातावरण पनि हरियाली राख्न मद्दत पुग्छ । हजुरआमा र आमाले कौसीबारीमा धेरै फूल र बिरुवाहरू लगाउनुभएको छ । म कहिलेकाहीँ विद्यालय बिदा हुँदा फूलमा पानी हाल्न सहयोग गर्छु। मलाई फूलमा पानी हाल्दा रमाइलो लाग्छ । यसले हामीलाई प्रकृतिप्रति माया र जिम्मेवारीको भावना विकास गराउँछ । आमासँगै मलाई लुगा सुकाउन मन पर्छ । म आमासँग छतमा लुगा सुकाउन जान्छु। यस्तो काम गरेको देख्दा आमा धेरै खुसी हुनुहुन्छ। अझ आमा घरमा नहुँदा पानी पर्न लागेमा दाइ र म मिलेर लुगा पनि उठाउँछाैँ । दाइ र म विद्यालय बिदाको दिनमा घर सफा गर्न आमालाई सहयोग गर्छौं। घर सरसफाइ गर्दा हामी स्वस्थ र निरोगी हुनुका साथै घर पनि सफा र सुन्दर देखिन्छ। यसरी म मेरो परिवारलाई सहयोग गर्छु । यस्ता सरल कामले हामीलाई कामको महत्त्व सिकाउँछ । यसरी काम गर्दा हाम्रो आपसी सम्बन्ध बलियो हुनुको साथै सहयोगी भावनाको विकास हुन्छ।