Share:

म समय हुँ। म सबै कुराको साक्षी हुँ । म त्रिलोकको सम्पूर्ण घटनामा उपस्थित थिएँ र आउने वर्षहरूमा पनि हुने नै छु । यो ब्रह्माण्डमा म यत्र तत्र सर्वत्र छु । म समय हुँ । म आत्मनिर्भर छु म न कसैको लागि कुर्छु न त कसैमा निर्भर नै हुन्छु । म समय हुँ । परमेश्वरले यो जगत निर्माण गर्दा केवल म थिएँ । म समय हुँ । म रावणवतदेखि द्रौपदी वस्त्रहरणसम्म सबैमा साक्षी रहेको छु । तर मेरो पनि धर्म हुन्छ । नीति हुन्छ । मान्नुपर्ने नियम पनि हुन्छन् । म सबै घटनाको साक्षी त हुँ तर मलाई हस्तक्षेप गर्ने कुनै अधिकार छैन । मानवहरू जस्तो “कठै” भनेर आँखा चिम्लने क्षमता पनि छैन । यसै कारण म सुखदुःख सत्यअसत्य सबै हेर्न बाध्य हुन्छु ।

म नेत्रहीन छु अर्थात् मलाई पक्षपात गर्ने अधिकार पनि छैन । मेरा लागि देवता र असुर सबै समान हुन् । अर्जुन र दुर्योधन दुवै समान हुन् । म अटल छु। सत्ययुगदेखि अहिलेसम्म चलिरहेको कलियुगसम्म म आफ्नै स्थानमा चलिरहेको नै छु। किनभने जुन दिनमा चल्न बन्द गर्छु, त्यो दिन पूरा संसार नै बन्द हुन्छ। म समय हुँ। म परिवर्तनशील छु। नीतिनियम, संस्कार, कानुन सबै समयसँगै परिवर्तन भएको मैले देखेको नै छु। किनभने सबै चिजको एउटा आयु हुन्छ। आयु नभएको त केवल म छु र त्यसैले नै म समय हुँ।

म समय हुँ । म नियमबद्ध छु । बगिरहेको पानीझैँ मलाई कसैले आफ्नो कर्म गर्न रोक्न सक्दैन । म कसैको प्रतीक्षा पनि गर्दिनँ । मलाई न सुख हुन्छ न त दुःख नै । मेरो काम त कथा सुनाउने हो । कथा लेख्ने पनि होइन, लेखिसकेको कथाको सम्पादन गर्ने पनि होइन । म एउटा अदृश्य शक्ति हुँ । म भूत पनि हुँ, वर्तमान पनि र भविष्य पनि । सुन्छु, मानवजातले मलाई बुझ्न घडी बनाएका छन् । मलाई बुझ्ने प्रयत्न गरेकोमा म अतिप्रसन्न त छु तर वास्तवमा त्यो घडी पनि मेरै अधिनमा छ । मलाई सतप्रतिशत बुझ्न कसैले सक्दैन ।

म समय हुँ । मेरो काम त कर्मभूमि प्रदान गर्ने हो । उक्त कर्मभूमिलाई स्वर्ग बनाए पनि, नर्क बनाए पनि, म केहीको पनि श्रेय लिँदिन । म त केवल हेर्छु र आनन्द लिन्छु । म हत्यारा पनि हुँ । मेरै कारण लाखौँको सङ्ख्यामा मानिसहरू दिनदिनै मृत्यु प्राप्त गर्छन् । तर कसैले मलाई दण्ड दिँदैन । किनभने हत्या गर्नु पनि मेरो कर्तव्य नै हो । यसै कारण कतिपय मानिसले मलाई कठोर पनि भन्छन् । म भाग्यमानी छु । श्री विष्णुका १० वटै अवतारको दर्शन गर्ने अवसर म बाहेक कसैले पाएको छैन । श्री कृष्णको सम्पूर्ण लीलाहरूमा उपस्थित हुने सायद म मात्र एक हुँ । तर, म अहाेभाग्यमानी पनि छु । माता सीताको अपहरणदेखि गान्धारनरेश शकुनीको षड्यन्त्रहरू सबै देखेर पनि म चुप बस्न विवश थिएँ । यसै कारण सायद म पापी पनि हुँ ।

म न्यायधीश हुँ । सबै अपराधको साक्षी हुँ । मानिसले लुकेर गरेका सबै अपराधहरु पनि म देख्छु । कि त यही जन्ममा कि त अर्को जन्ममा उपयुक्त दण्डको व्यवस्थापन पनि गर्छु । म न्यायको प्रतिमूर्ति हुँ । म समय हुँ । म तपस्वी हुँ । मेरो जीवन नै साधना हो । मेरो शक्ति अधिक छ तर म पनि नियमबद्ध छु । म सर्वशक्तिशाली होइन । सर्वशक्तिशाली त भगवान् हुन्, र त्यो पदको चाहना पनि म गर्दिनँ । किनभने आशा आकाङ्क्षा राख्ने त मेरो क्षमता नै छैन ।

म आफ्नो पदमै ठिक छु । मेरो पद सर्वश्रेष्ठ साक्षी हो। म अन्तरयामी हुँ । म न कसैको मित्र हुँ न कसैको शत्रु नै । म न मानव हुँ न असुर हुँ, न देव नै । म त केवल समय हुँ । जगत् सञ्चालनमा मेरो भूमिका अपरिहार्य छ तर म सधैँ धर्मको नै साथ दिन्छु किनभने म समय हुँ।