Share:

नयाँ नेपाल निर्माणको सपना

आफ्ना इच्छाका पाना पल्टाएर हेर्दा,

दिमागमा अङ्किएका तरङ्गका तस्बिर कोर्दा।

सहिदका बलिदान सम्झिएर फेरि

कल्पनाको देशमा उड्नुको गर्व हेरी ।

अहिलेका पिँढीलाई अब कसरी बुझाऊँ?

अत्याचारीका कठोर शिर कसरी झुकाऊँ?

लाख कोसिस गर्दा पनि हुन्न नयाँ थालनी,

फेरि सोच्छु, के एकदिन म यो गर्न सकुँला नि?

नयाँ नेपाल निर्माण त सपना नै भइगयो,

नेताका भाषण र वचन केवल खेल भयो।

हत्या, हिंसा र बलात्कार कति यहाँ बढ्छन्,

मद्यपानमा झुम्नेहरू देश कसरी सुधार्छन् ?

जुनसुकै समाचार खोल्छु, सुन्छु एउटै भाषण

"समृद्ध नेपाल, सुखी नेपाली हामी बनाउँछौँ।

" सोच्छु नेपाली कहिले खुसी होलान्, कहिले होला समृद्ध?

अहिले हामी बाँचिरहेछौँ कि केवल भ्रममा प्रतिबद्ध?

हे बुबा, आमा, दाजु, भाइ, दिदी र बहिनी हो!

नयाँ नेपाल निर्माण गर्ने कर्तव्य हाम्रै हो।

त्यसैले यो सपना साकार पार्न अघि सरौँ,

हातमा हात, काँधमा काँध मिलाई अघि बढौँ।