Share:

पिएरै विष झैँ यहाँ गुण सबै फाल्छन् कुनियतले।

हल्लाउँछन् देशको जगै सधैँ छली राजनीतिकै रूपले

बुझनू के अब योजना र नीतिको मसी सबै पोखियो

योग्यता सब ओझेल परेछ यहाँ सत्ताको खेलमा थिचियो।

हिमालदेखि तराईसम्मै बग्ने नदी झैँ क्षमता छ त।

सुक्दै छन् सपना विकासका सबै पाएका छैनन् यहाँ पद।

जडीबुटी र प्रकृति बुझेर नि काम छैन केही अहो।

झुटा आश्वासन र स्वार्थको पछि देशको दुर्दशा भयो।

भ्रष्टाचारको दबदबा रोक्नलाई कसले चाल्ने कदम अब?

रूख काट्ने बञ्चरोले घाँस काट्ने विसङ्गति छ यहाँ सब

जाति र धर्ममा अलमल्याएर भोटको राजनीति भयो

योग्य जनहरू पलायन भए देशको भविष्य कता गयो ?

साना कोपिलाहरू फूल्न खोज्छन् अवसर पाए देशमै।

नपाए सिप र योग्यता बेच्न जान्छन् परदेशी भेषमै

भोलिको सुनौलो भविष्य भन्दै आज त अलपत्र छ

योग्यताको कदर नहुने ठाउँमा उज्यालो कसरी आउँछ ?

लङ्गुरले बुझ्न सक्दैन कहिल्यै अङ्गुरको स्वाद र गुण।

देशको व्यथा र गौरव गाथा लेख्ने कसरी यो मन ?

स्वाभिमानले कसरी भनूँ म वीरको अमर गाथा ?

योग्य जनले अवसर नपाउँदा दुख्छ मेरो देशको व्यथा।