Share:

नतिजाको पछाडि लुकेको मेरो प्रयास

सबैले देखे मात्र पानाको अङ्क,

कसैले बुझेनन् मनको त्यो तरङ्ग।

सोधे केवल 'किन भएन विकास?'

बुझेनन् कसैले नतिजा पछाडिको प्रयास।

​ बलेका छन् रातमा आँखाका बत्ती,

निद्रालाई त्यागेर पढेँ म कत्ति!

आमाबुबाको मुहारमा हाँसो फुलाउन,

सुकाएँ खुसीका मुनाहरू आफ्नै मनाउन।

​ अङ्कका पानामा मात्र होइन सीमित,

लुकेका छन् त्यहाँ सपना र आँसु असीमित।

मलाई गालीको विष हैन, हौसलाको अमृत देऊ,

दबाबको साङ्लो छाडी थोरै विश्रामको सास देऊ।

​पढ्दिनँ भन्दैन म, अझै अघि बढ्छु,

सपनाका पहाडहरू म आफैँ चढ्छु।

तर याद राख,

नतिजा त केवल एउटा पाना हो,

मेरो प्रयास त सिङ्गो जीवनको पाना-पाना हो!

​मलाई अङ्कको तराजुमा तोक्ने समाज हैन,

मेरा भावनालाई बुझ्ने एउटा न्यानो मन चाहिन्छ।

आज अङ्क कम होला, भोलि सूर्य उदाउँछ,

मेरो अथक प्रयासले एकदिन सफलता अवश्य ल्याउँछ!

-सजना