Share:

इमानदारीको फल

एक सानो गाउँमा राम नामको केटा बस्थ्यो । ऊ कक्षा ४ मा पढ्थ्यो । राम धेरै राम्रो, मेहनती र इमानदार केटा थियो । ऊ हरेक दिन बिहान छिटो उठ्थ्यो । उठेर ऊ हात मुख धोएर आमालाई घरको काममा सहयोग गर्थ्यो । त्यसपछि ऊ खाना खाएर स्कुल जान्थ्यो । रामका शिक्षकहरू उसलाई धेरै मन पराउँथे किनकि ऊ सधैँ पढाइमा ध्यान दिन्थ्यो र झुट बोल्दैनथ्यो ।

रामका धेरै साथीहरू थिए । उनीहरू स्कुलमा सँगै पढ्थे, खेल्थे र रमाइलो गर्थे । राम सबैसँग मिलेर बस्ने केटा थियो । ऊ कहिल्यै कसैसँग झगडा गर्दैनथ्यो । शिक्षकले जे सिकाउनुहुन्थ्यो, राम ध्यान दिएर सुन्थ्यो । एक दिन राम बिहान स्कुल जाँदै थियो । बाटोमा ऊ बिस्तारै हिँडिरहेको थियो । अचानक उसले बाटोमा एउटा पर्स देख्यो । पर्स कालो रङको थियो । रामले पर्स उठायो । उसले वरिपरि हेर्‍यो तर त्यहाँ कोही पनि थिएन । रामले सोच्यो, यो पर्स कसैको हराएको होला । रामले पर्स खोलेर हेर्‍यो । भित्र केही पैसा र एउटा परिचय पत्र थियो । रामलाई लाग्यो, यदि मेरो पर्स हराएको भए मलाई पनि धेरै दुःख लाग्थ्यो । त्यसैले उसले पर्स फिर्ता दिनुपर्छ भनेर सोच्यो । राम पर्स लिएर सिधै स्कुल गयो । स्कुल पुगेपछि उसले आफ्नो शिक्षकलाई सबै कुरा भन्यो । शिक्षकले रामको कुरा ध्यान दिएर सुन्नुभयो । त्यसपछि शिक्षकले पर्सभित्रको परिचय पत्र हेर्नुभयो । त्यसमा एक जनाको नाम र ठेगाना लेखिएको थियो । शिक्षकले त्यो ठेगाना हेरेर ती मानिसलाई खबर गर्नुभयो । केही समयपछि पर्सका मालिक स्कुलमा आए । उनी धेरै चिन्तित देखिन्थे । उनले आफ्नो पर्स हराएको बताएका थिए । जब शिक्षकले पर्स देखाउनुभयो उनी धेरै खुशी भए । उनले रामलाई धन्यवाद दिए । उनले भने, छोरा, तिमी धेरै राम्रो केटा रहेछौ । यदि तिमीले यो पर्स राखेको भए म धेरै दुःखी हुन्थेँ । उनले रामलाई इनाम दिन खोजे तर रामले मुस्कुराएर भन्यो, मलाई इनाम चाहिँदैन । मैले सही काम मात्र गरेको हुँ । शिक्षकले रामको धेरै प्रशंसा गर्नुभयो । अर्को दिन स्कुलको प्रार्थनामा शिक्षकले सबै विद्यार्थीलाई यो घटना सुनाउनुभयो । सबै विद्यार्थीले रामका लागि ताली बजाए । रामलाई धेरै खुशी लाग्यो । राम घर फर्केर गयो । उसले सबै कुरा आफ्नो आमाबाबुलाई भन्यो । उसका बुबा र आमाले धेरै गर्व महसुस गर्नुभयाे । बुबाले भने, बाबू, सधैँ इमानदार बन्नु । इमानदारी मानिसको सबैभन्दा ठुलो गुण हो ।

त्यस दिनपछि गाउँका सबै मानिस रामलाई राम्रो केटा भन्थे । राम पनि सधैँ सही काम गर्ने प्रयास गर्थ्यो । उसले कहिल्यै झुट बोलेन र अरूको चीज कहिल्यै लिएन । यसरी रामले आफ्नो राम्रो व्यवहार र इमानदारीले सबैको मन जित्यो । इमानदारीले मानिसलाई सधैँ सम्मान र खुसी दिन्छ ।